1. 膠人：我感冒，打咗好多個乞嗤，喉嚨有啲痕。
我：哦。有冇鼻水鼻塞？
膠人：有少少鼻水。不過我打咗好多個乞嗤，喉嚨有啲痕。（佢覺得我聽唔到？）
我：OK，咁有冇咳？
膠人：冇咳。不過我打左成日乞嗤，喉嚨有啲痕。（佢覺得我唔理佢？）
我：除咗打乞嗤喉嚨痕之外，有冇發燒？
膠人：應該冇。琴日我打咗好多個乞嗤，喉嚨好痕咁。
我：⋯⋯ （你哋教我仲可以講乜嘢？）
2. 死肥𡃁仔由係護士站登記，入到我房，坐低埋，全程耳仔塞住耳筒，對手㩒緊手機玩遊戲。
佢對眼一時望我，一時又望個屏幕，覺得我可以就咁開始問診。老娘最終發火，問佢要打機定係睇醫生。後面成村人等緊！！一係你就打完機先好死入嚟！！
佢話唔係呀，OK啊，但係隻手仲㩒緊！又唔Bother去除咗個耳筒。直至我叫佢咁不如你都係出返啦！你識尊重我嘅時候先好入返黎！佢咁先至肯收嘢。
我睇症都係阻你5分鐘、10分鐘，咁唔得閒咪唔好睇醫生囉！逼你架咩？
～～～
終於試咗個盒茶餐廳曲奇。菠蘿包味餅扣分，因為佢其實只係菠蘿味。邊有傳統菠蘿包有菠蘿味㗎？豉椒嗰個淨係得個辣字。鮮蝦雲吞就真係好鮮蝦雲吞，有驚喜！
～～～
去西營盤帶狗公主去睇獸醫，發現呢間好可愛嘅食店。個蘑菇意大利飯賣相普通，不過出奇地好味。西班牙海鮮飯唔明點解咁汁咁稀，但係都幾好味。跟住叫咗個狗食得嘅嘅藍莓雪糕，但係我隻嘢竟然唔食。$38呀大佬！食一啖就唔要！
張相入面隻大狗（？Poodle）嘅主人係一個好型嘅女仔。佢一邊頭剃光咗，第二邊就留長頭髮，鬢黑人個D好多Beads嘅辮。
附帶狗公主真身照片一張。佢係有抱負望向汪洋嘅小狗！
Search